Inadlaw

Sayo sa buntag momata ka na. Mobarog ug manghiwid. dayon padulong sa kasilyas. Mangihi, mangotot, malibang ug maghinuktuk.
Maminaw sa tukar sa radyo sa silingan.

Unsay naa sa imong huna-huna samtang naglingkod ka sa imong trono?

Dapat dili ko ma-late, kinahanglan nga magdali ko.

Magpa-agas sa gripo. Kung hapit na mapuno, ihumol ang kamot sa tubig. "Ay, kabugnaw, katugnaw."

Manguros, dayon bubu ug upat ka kabo nga tubig.
Kisi-kisi, kirig-kirig sa katugnaw.
Pug-on ang shampoo kay gikaw gituwad, hapit na walay sulod. Sa gamayng tulo, ihidhid dayon sa ulo. Kuso-kuso dalang kalot-kalot para mapukaw ang mga nangatulog nga kaspa.

Dayon kab-ot sa nipis nga sabon. Unahon ang ilok, dayon sa bukton. Pikas ilok ug bukton. Sa lawas, tiyan, pus-on, ubos, ubos, bugan, duha ka pa-a, tuhod, bagtak, tiil ug kuyamoy.

Banwas dayon kay hapit na mahurot ang tubig sa balde.

Ang karsones nga gibitay, daw hinaynay nga wala malabhi pipila ka bulan na. Mura na ug gi-stone wash. Ayaw na lang simhuta kay mosombalik sa imong huna-huna ang mga panghitabo pipila na ka-adlaw ang nilabay. Sinuka-ay sa sobrang tagay. Humot sa babayeng nangalimyon sa kagabhi-ong malawm, di-in nagalingkod ug nagaba-i-id sa imong pa-a. Ug niadtong tungura, muna-muna pa nimong dinumbulay sa sonatang nagboto-boto sa dalan' mango sa ciudad sa sugbu.

Iyabyab ang pantalon, basin aduna pay sensiyo nahabilin. Isu-ot dayon ang karsones. Aw, mag-brief pa diay ka una. Dayon ang sinina. Ayaw kalimti ang deodorant para dili ka manimahong kinilaw sa imong singot. Mangatuli. Manudlay, sa hinapay nga na-andan sukad pa pagkabata. Hiwa-a ang kilid matud pa ni lola. Pilit kaayo ang hinapay. Apila ang kilay.

Iyabyab sad ang medyas una isul-ot kay basin adunay sinsiyo. Isul-ot dayon.
Parisan dayon sa chuck taylor nga busluton.
Nga mura'g pipila na ka dalan ang nabaktas, natumban ug nalaktod. Pipila na sad ka mga ta-e ang napusgay. Mga latang nasikaran. Apan wala pa jud ni ti-il nga natumban.